Ylvi Beqaj: Më ofruan 7 mln euro për të mos dëshmuar ndaj Shullazit

Aktualitet

Pas 16 seancash gjyqësore të shtyra, Ylvi Beqja, bashkëpunëtori i Prokurorisë së Krimeve të Rënda ka nisur të rrëfejë dëshminë e tij, kundër Emiljano Shullazit, Gilmando Danit dhe të pandehurve të tjerë të këtij procesi.

Për gati një orë, Beqja ka dëshmuar para gjykatës duke treguar fakte të reja, por dëshmia e tij është ndërprerë në momentin kur avokatët kryesisht të Shullazit dhe të pandehurve të tjerë, janë larguar nga salla e gjyqit, me argumentin se nuk ndiheshin mirë.

Asnjë nga të pandehurit, nuk ka qenë prezent në këtë gjykim. Ndërkohë që vetë Shullazi kishte njoftuar gjykatën se ishte i shtruar në spital pasi kishte kryer një ndërhyrje kirurgjikale dhe e kishte të pamundur të ishte fizikisht në gjyq.

Biznesmeni ka treguar në gjykatë një fakt interesant, pasi një person i akuzuar për vrasje në Tiranë, i është afruar duke i dhënë një ofertë prej 7 milion euro, në këmbim që ai të tërhiqej nga dëshmia kundër Shullazit.

Madje sipas rrëfimit të Beqjat, ky person e ka garantuar se 1 milion euro ishin të gatshme për tu dhënë direkt në dore, ndërsa pjesa tjetër me këste, vetëm me kushtin që ai të hiqte dorë.

Në prezencë të prokurorëve dhe gjyqtarëve, biznesmeni Ylvi Beqja ka treguar se edhe gjatë kohës kur ka qenë i mbrojtur nga policia dhe prokuroria, ai ka marrë kërcënime dhe oferta të ndryshme për tu tërhequr nga dëshmia e tij, kundër Emiljano Shullazit, Gilmanod Danit dhe Endrit Zela e Endrit Qyqja.

Beqja i ka treguar gjykatës se ka marrë kërcënim nga nje person që është akuzuar për një vrasje. Ky kërcënim sipas Beqjas është bërë në telefon dhe në mënyrë verbale. Madje Beqja në rrëfimin e tij 1 orësh para gjykatës së Krimeve të Rënda, mësohet të ketë treguar dhe një moment tjetër për disa deklarata mediatike të disa biznesmenëve nga Fushë-Kruja, që pretendonin se ai u kishte marrë para borxh dhe nuk ia kishte kthyer.

Burime pranë Gjykatës së Krimeve të Rënda thanë për “Shqiptarja.com” se dëshmitari i prokurorisë Ylvi Beqja, i tregoi gjykatës se këta biznesmenë që kanë dalë në media, janë kërcënuar dhe kanosur me armë nga një person nga Fushë-Kruja, me mbiemrin Shullazi dhe nga një person tjetër, i akuzuar për vrasje në kryeqytet.

Gjithmonë sipas dëshmitarit të prokurorisë, në orkestrimin e daljes së biznesmenëve në media,kanë marrë pjesë dhe avokatët e Emiljano Shullazit dhe një tjetër avokat i njohur që dikur ka qenë prokuror i lartë.

Në dëshminë e tij Beqja ka shtuar se për këtë ka prova bindëse dhe se është i gatshëm t’ia verë në dispozicion gjykatës dhe prokurorisë. Nga ana tjetër biznesmeni ka rrëfyer në seancën e djeshme, se Shullazi e ka kërcënuar herë pas here, duke e detyruar që ai të shtonte përqindjen e pronës që do i dhuronte, tek ish-hotel Vollga, nga 10 në 20 për qind.

Gjithashtu Beqja i ka qëndruar një pjesë të rrëfimit të tij dhënë në prokurori, duke pohuar se tek Shullazi e ka çuar avokati me inicialet N.F, dhe se pas kësaj kanë filluar kërcënimet e vazhdueshme .N.F, ka qenë avokat, në procesin civil që Ylvi Beqja ka zhvilluar kundër shtetasit Zanmir Hasa, për ish-hotel Vollgën në Durrës.

Administratori i kompanisë “Saudi Brather Comercial Company” ka rrëfyer para gjykatës se pas arrestimit të grupit të Shullazit, ai ka marrë një ofertë të re, në mënyrë që të tërhiqej nga dëshmia.

Sipas rrëfimit që Beqja ka bërë,një person i njohur prej tij dhe me precedent penalë, e ka kontaktuar ne telefon, dhe ka kërkuar takim me të. Ky takim është realizuar dhe pikërisht aty Beqja, tregon se ka marrë ofertën, për tu tërhequr nga dëshmia që ka dhënë në prokurori.

Në këmbim të tërheqjes Beqja mësohet t’i ketë treguar gjykatës se personi i ka ofruar 7 milion euro, ku 1 milion do i jepeshin në dorë, vetëm me kushtin që ai të tërhiqej nga dëshmia që ka dhënë në Prokurorinë e Krimeve të Rënda.

Këtë ofertë Beqja ka treguar se nuk e ka pranuar, dhe fill pas kësaj një grup personash janë angazhuar duke kërcënuar me armë disa tregtarë në zonën e Fushë-Krujës, për ti regjistruar ata me kamera në ambientet e një lokali, teksa deklaronin se Ylvi Beqja i ka marrë para borxh. Më pas sipas Beqajt deklaratat e këtyre tregtarëve janë publikuar dhe në media.

/Shqiptarja.com

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *