Delegacioni i SPAK niset drejt Italisë, trajnim me Antimafian

Një delegacion me prokurorë të SPAK janë nisur drejt Italisë, ku do të zhvillojnë një trajnim të përbashkët në Romë me Antimafian italiane , Antiterrorizmin, si dhe pranë strukturave hetimore italiane të Policisë së Shtetit, Karabinierëve dhe të Guardia di Finanza.

Para nisjes në Romë, mësohet se delegacioni i përbërë nga prokurorë të SPAK, hetues të BKH dhe të Policisë së Shtetit, të kryesuar nga Kreu i Strukturës së Posaçme, Altin Dumani, u prit nga ambasadori i Italisë në Tiranë, Fabrizio Bucci.

Veprimtaria e rëndësishme trajnuese financohet nga Bashkimi Evropian nëpërmjet projektit EU4LEA, i menaxhuar nga disa kombe, në të cilin marrin pjesë Italia, Austria dhe Spanja, të udhëhequr nga Ministria e Brendshme italiane nëpërmjet Drejtorisë Qendrore të Policisë Kriminale, e cila ka caktuar Drejtuesin e Projektit (Drejtues i parë i Policisë së Shtetit) dhe Udhëheqësin e ekipit të projektit (Kolonel i Karabinierëve).

Zyra qendrore e projektit ndodhet në Tiranë dhe përbëhet nga personel shqiptar me kualifikim të lartë nën drejtimin e Udhëheqësit të Ekipit.