Kaos në futbollin australian, gjyqtarët në grevë
Futbolli australian është përfshirë nga një krizë e papritur, pasi gjyqtarët profesionistë kanë vendosur të bojkotojnë ndeshjet e ardhshme, duke vënë në pikëpyetje zhvillimin normal të sezonit të ri.
Shoqata Profesionale e Arbitrave të Futbollit (PFRA) dhe anëtarët e saj kanë refuzuar të marrin përsipër emërimet e ardhshme, derisa të zgjidhet mosmarrëveshja për mënyrën e punësimit të tyre.
Problemi kryesor nuk lidhet me pagat, por me institucionin që do t’i punësojë arbitrat dhe konfliktin e mundshëm të interesit që mund të krijohet.
Football Australia ka propozuar një model të ri, ku arbitrat do të kenë kontrata të ndryshme në varësi të kompeticionit ku gjykojnë.
Për Australia Cup dhe Australian Championship, ata do të kontraktoheshin nga Football Australia, ndërsa për A-League do të kishin marrëveshje të veçanta me Australian Professional Leagues (APL).
Ky propozim ka shkaktuar kundërshtim të fortë nga PFRA, pasi APL është në pronësi të klubeve të A-League dhe, sipas arbitrave, kjo mund të krijojë konflikt interesi.
Gjyqtarët frikësohen se një strukturë e tillë mund të ndikojë në pavarësinë dhe paanshmërinë e tyre gjatë ndeshjeve.
Bisedimet mes palëve dështuan të premten, duke çuar në vendimin e arbitrave për të hyrë në grevë.
“Ne nuk e marrim lehtë vendimin për të ndaluar gjykimin e ndeshjeve. Anëtarët tanë duan të arbitrojnë, të përgatiten për sezonin e ardhshëm dhe të kontribuojnë pozitivisht në futbollin australian”, deklaroi presidenti i PFRA-së, Evgeny Vizelman.
Pavarësisht konfliktit, Football Australia ka konfirmuar se dy gjysmëfinalet e Australia Cup, të planifikuara për 9 dhe 15 shtator, do të zhvillohen sipas programit.
Nëse marrëveshja nuk arrihet, organizatorët mund të detyrohen të sjellin arbitra nga jashtë Australisë, të cilët do të paguheshin për çdo ndeshje.
Situata mund të komplikojë edhe nisjen e sezonit të ri të A-League Men, i cili është planifikuar të startojë më 16 tetor, në të njëjtën ditë kur nis edhe Australian Championship.
Kriza e arbitrave vjen në një moment të vështirë për futbollin australian, pasi APL është gjithashtu në konflikt me futbollistët, me marrëveshjen kolektive që ka skaduar më 30 qershor 2026 dhe negociatat për një kontratë të re që kanë dështuar deri tani.