Pamja e Shkodrës është horror, po fajin e ka elita !

Aktualitet Shkrime

Skerdjan Dhuli

Nuk e ka fajin rinia e Shkodrës që u lëshuan si turmë e dalë nga kontrolli për të takuar yjet e Përputhen (o Zot çfarë krimi. Yje nga Përputhen ? Jo jo. Llum. Niveli ZH i shoqërisë). Fajin e ka elita. Elita duke humbur vendin e saj si busull orientuese për rininë, e la bosh terrenin e modelit dhe atë e zuri llumi. (Do e përdor shpesh fjalën llum, se nuk kam tjetër sinonim)Unë nuk kam asnjë fije dyshimi se emisioni Përputhen është llum.Madje janë llum edhe ata që e zhvillojnë një format të tillë. Regjizorët e këtij emisioni dhe autorët e tij janë kryellum.Po pse gjetën terren ? E gjetën sepse atë e la bosh elita intelektuale, shoqërore, arsimore, politike etj.

Nëse një të riu i ofron si model mësuesin cilësor, mjekun e përkushtuar apo policin dinjitoz, nuk do turret drejtë llumit. Po pse e bën ? Sepse ai nga mëngjesi në darkë sheh sesi i bjerren vlerat.I bjerret e mira kur sheh se media nuk i ofron kurrë një shembull pozitiv. Në çdo emision ku flitet për showbiz, gjen një nga këta surrogatot e Përputhen. Madje tani i gjen në çdo studio duke komentuar edhe futboll. E çfarë mendon një i ri kur sheh se suksesi kalon nga rrugë të tilla ? Kur sheh se si media promovon këtë produkt të fabrikuar nga vetë ajo ? Atëherë do i ndjek si shembull. I flet njeri rinisë për mësuesin model ?

Jo. Ai vep anatemohet dhe është kthyer në një figurë pa respekt. Po mjekun e përkushtuar e respekton njeri ? Kurrë. E di njeri se Shqipëria ka mjekë të niveleve më të larta Europiane ? Jo. Media kurrë nuk i sjell ata tek publiku. Po për shqiptarët që arrijnë suksese në vendet e huaja i sjell njeri si shembull ? Kurrë. Me ata merremi vetëm kur shohim se kanë sukses në arenat e mëdha dhe merremi thjeshtë se janë shqiptarë. Tërheqim pak nga lavdia e tyre nëpërmjet nacionalitetit. Po për sportitë elitar ju flet njeri ? Kurrë. Keni parë njeri të shkojë të bëjë foto me atletin elitar Izmir Smajlaj, boksierin Gjetan Keta apo futbollistin Myrto Uzuni ?

Jo. Ata nuk i sjell njeri si model. Modeli për mediat janë llumi i përputhen. Po djemtë dhe vajzat tona që shkojnë në misionet paqeruajtëse kudo në botë, a flet njeri ? Jo. Me ta merremi vetëm nëse largëqoftë bien dëshmorë. Asokohe i bëjmë story. Po për mjekë si Altin Veshti që janë ndër më të mirët në Europë për shërbimin e kardiopediatrisë, flet njeri ? Jo. Madje nuk e dinë që egziston. Tani që e përmenda unë, rrezik mendojnë “ça thotë ky budallai”.Prandaj nuk duhet të ankoheni pse rinie endi pas llumit. Asaj nuk i është ofruar kurrë shembulli i mirë. Ajo ka parë sesi bëhesh i famshëm e i pasur vetëm nëpërmjet kësaj rruge. Shoqëria jonë ka nevojë për rrokadë orientimi. Në të kundërt, ditë më të zeza na presin…