Arrestohen shefa krimesh të përfshirë në grupe kriminale, shpallet në kërkim …
Të tjera detaje janë zbuluar lidhur me operacionin e përbashkët të SPAK, AMP-së dhe Policisë së Shtetit. Burime për mediat bëjnë me dije se në kuadër të këtij operacioni i cili është shtrirë në disa qytetë të Shqipërisë, përfshirë Tiranën, Kukësin, Fierin, Vlorën, Gjirokastrën dhe Sarandën, janë goditur disa grupe kriminale të përfshira në trafikun e drogës.
Gjatë operacionit të SPAK, AMP-së dhe Policisë janë lëshuar 10 masa sigurie të firmosura nga GJKKO, pas kërkesës së Prokurorisë së Posaçme.
Mësohet se 4 masa të sigurisë janë për oficerë të policisë. Deri më tani janë ekzekutuar tre masa, ndërkohë që një tjetër nga radhët e bluve është shpallur në kërkim.
Një prej të arrestuarve është shefi i Krimeve në Himarë, Shkëlzen Ruska, i cili akuzohet për për kultivim kanabisi, pjesëmarrje në grup kriminal të strukturuar, shpërdorim detyre dhe veprime të tjera të kryera nga organizata kriminale.
Gjithashtu, në pranga ka rënë edhe shefi i Krimeve në Komisariatin e Lushnjës, Ervis Alisinanaj, mbi të cilin rëndojnë të njëjtat akuza si dhe kolegu Ruska. Ndërkohë, një tjetër akuzë e cila rëndon mbi Alisinanajn është dhe ajo e ushtrimit të ndikimit të paligjshëm ndaj funksionarëve të tjerë publikë.
Sakaq, në kërkim është shpallur Shefi i Komisariatit të Policisë Kufitare në Sarandë, Elvis Dërvishi, Ai akuzohet për “trafikim narkotikësh”, “Grup të strukturuar kriminal”, “Kryerja e veprave penale nga organizata kriminale” dhe “Shpërdorim detyre”.
Police të arrestuar nga Amp:
1)-Shkëlzen Ruska me detyrë shef krimesh në Himarë,
Akuzat: kultivim kanabisi, grup i strukturuar kriminal, shpërdorim detyre dhe kryerja e veprave penale nga organizata kriminale.
2)-Ervis Alisinanaj, shef krimesh ne Lushnje,
Akuzat: kultivim kanabisi, grup i strukturuar kriminal, shpërdorim detyre dhe kryerja e veprave penale nga organizata kriminale. e ushtrimi i ndikimit të paligjshëm ndaj personave që ushtrojnë funksione publike.
3-Erdit Hazizaj është personi i tretë i arrestuar. Hazizaj është larguar nga policia në vitin 2022.
Në kërkim me masë sigurie “arrest në burg”:
1-Elvis Dervishi i Komisariatit i Policisë Kufitare në Sarandë,
Akuzat: trafikimi të narkotikëve, grup të strukturuar kriminal, kryerja e veprave penale nga organizata kriminale dhe grupi i strukturuar kriminal dhe shpërdorim detyre.