Franca lëshon urdhër-arresti për Presidentin e Sirisë dhe vëllanë e tij
Gjyqtarët francezë kanë lëshuar fletarrestim për presidentin e Sirisë, Bashar al-Assad, vëllain e tij Maher al-Assad, dhe dy zyrtarë tjerë të lartë, lidhur me përdorim të armëve të ndaluara kimike kundër civilëve në Siri, ka thënë një burim brenda gjyqësorit për agjencinë e lajmeve Reuters.
Fletarrestimet – të cilat lidhen me akuza për përfshirje në krime kundër njerëzimit dhe në krime lufte – vijnë pas një hetimi penal për armët kimike në qytezat Douma dhe Gutën Lindore, në gusht të vitit 2013. Si pasojë e atyre sulmeve kanë vdekur më shumë se 1.000 njerëz.
Ky është fletarrestimi i parë ndërkombëtar që është lëshuar për presidentin e shtetit të Sirisë, forcat e të cilit kanë tentuar t’i shtypin me forcë protestat e popullit që kanë nisur më 2011.
Ekspertët e Kombeve të Bashkuara kanë thënë se shtypja e evidentuar në Siri përbën krim lufte. Kjo është edhe hera e parë që është lëshuar fletarrestim për përdorim të armëve kimike në Guta, më 2013, ka thënë Mazen Darwish, avokat dhe themelues i Qendrës Siriane për Media dhe Liri të Shprehjes, i cili e ka hapur një rast në Francë
Presidenca siriane dhe Ministria për Informacion, nuk janë përgjigjur në kërkesat për koment.
“Presidenti është përgjegjës për shumë krime në Siri – mirëpo me këtë lloj arme në veçanti – gazin sarin – është e pamundshme të mbushen zbrazëtitë (e përfshirjes së tij)”, ka thënë Darwish për Reuters, duke theksuar se miratimi i presidentit është i detyrueshëm kur ushtria mëton të përdorë një armë të tillë.
Në tetor, gjyqtarët francezë kanë lëshuar fletarrestime për dy ish-ministra sirianë të Mbrojtjes, për shkak të një sulmi me bombë të vitit 2017, që e ka vrarë një burrë francezo-sirian në shtëpinë e tij në Dara.