SPRINT NEWS ALBANIA

Aktualitet

Plagosi dy vëllezërit dhe ia mbathi, kapet 35-vjeçari në Tiranë!

 

Blutë i sekuestruan mjetin prerës, një sasi kokaine dhe 1150 euro, ndërkohë që dy vëllezërit ndodhen në spital nën kujdesin e mjekëve. Për ngjarjen është proceduar dhe një i mitur, për moskallëzim krimi.

Sipas gazetarit të Klan News autori i ngjarjes është Gert Latifi ndërsa dy të plagosurit quhen Rrest Abazaj dhe Viliardo Abazaj.

“Plagosi rëndë me mjet prerës, 2 shtetas (vëllezër), dhe më pas u largua, kapet dhe vihet në pranga, pas ndjekjes intensive nga shërbimet e Policisë, autori i dyshuar. Procedohet në gjendje të lirë një 17-vjeçar, për moskallëzim krimi. Sekuestrohen sasi lënde e dyshuar narkotike kokainë, 1150 euro dhe mjeti prerës me të cilin është kryer plagosja e 2 vëllezërve. 

Shërbimet e Komisariatit të Policisë Nr. 6, në vijim të punës për goditjen e paligjshmërisë, kapjen dhe vënien përpara përgjegjësisë të shtetasve që kryejnë vepra penale, pas informacioneve se një shtetas kishte plagosur rëndë me mjet prerës 2 vëllezër, në rrugën “Thoma Koxhaj”, dhe më pas ishte larguar, menjëherë kanë organizuar operacionin policor të koduar “Tracking”, për kapjen e tij.        

Si rezultat i këtij operacioni, pas disa orësh ndjekje intensive, është bërë lokalizimi dhe arrestimi i shtetasit G. L., 35 vjeç, banues në Lushnjë. 

Shtetasi G. L., pas një konflikti për motive të dobëta, në rrugën “Thoma Koxhaj”, ka goditur me mjet prerës shtetasit R. A., 26 vjeç dhe V. A., 31 vjeç (vëllezër), të dy banues në Tiranë, dhe më pas është larguar.    Me marrjen e informacionit, shërbimet e Komisariatit të Policisë Nr. 6, janë vënë menjëherë në ndjekje të tij dhe pas disa orësh ndjekje intensive, në bashkëpunim me shërbimet e Komisariatit e Policisë Lushnjë, në një hotel në Lushnjë, kanë lokalizuar shtetasin G. L., së bashku me një 17-vjeçar. Gjatë kontrollit fizik, shtetasit G. L. iu gjetën dhe sekuestruan 1150 euro, sasi lënde e dyshuar narkotike kokainë, si dhe mjeti prerës që dyshohet se ka përdorur për plagosjen e 2 vëllezërve.  Në vijim të veprimeve, nisi procedimi penal për 17-vjeçarin, pasi dyshohet se ka patur dijeni për ngjarjen dhe nuk ka kallëzuar pranë organeve kompetente. Dy vëllezërit e dëmtuar ndodhen në spital, nën kujdesin e mjekëve”, njofton policia.

“Sherri nisi për një vajzë, 3 vite më parë”, detaje nga plagosja e 2 vëllezërve në Tiranë

Detaje të reja janë zbuluar lidhur me plagosjen e dy vëllezërve mbrëmjen e djeshme në kryeqytet. Gazetarja e Klan News Glidona Daci bën me dije se autori i plagosjes Gert Latifi ishte kthyer pak kohë më parë nga Italia, ku jetonte me bashkëshorten dhe fëmijët.

Sherri mes të rinjve, sipas deklarimeve të tyre, kishte nisur për ngacmimin e një vajze, 3 vite më parë.

Mësohet po sipas Dacit se dje 35-vjeçari komunikoi me dy vëllezërit Abazi dhe la takim për t’u sqaruar. Konflikti mes tyre fillimisht nisi me fjalë, u pasua me sharje dhe përplasje fizike me grushta. Më pas Latifi i plagosi me thikë. Pas ngjarjes u largua menjëherë dhe u zbulua nga mjeti që lëvizte, të cilën e kishte marrë me qira. Përmes GPS-së së makinës policia bëri të mundur identifikimin dhe më pas lokalizimin e tij në Lushnjë në një hotel, ku iu gjet edhe një sasi kokaine./

Total 0 Votes
0

Tell us how can we improve this post?

+ = Verify Human or Spambot ?