Hiv/Aids në Shqipëri, ISHP: 80 raste të reja dhe 11 viktima në 10 muaj
Shqipëria vijon të regjistrojë të njëjtin trend të shifrave të HIV/AIDS çdo vit. Në 10-mujorin 2022 u identifikuan 80 raste të reja, mes tyre 2 fëmijë. Krahasuar me të njëjtën periudhë të vitit të kaluar ku u identifikuan 91 raste, shifra është pak më e vogël, por rastet pritet të shtohen deri në fundvit.
Eksperti i shëndetit publik në Institutin e Shëndetit Publik, Roland Bani, tha për Gazetasi.al se në vitin 2021 u identifikuan në total 104 raste të reja me HIV/AIDS. Sipas të dhënave zyrtare nga ISHP, prej vitesh HIV/AIDS po qarkullon në vendin tonë, ndryshe nga fillimet e saj kur virusi importohej nga jashtë. Numri më i madh i të prekurve vijon të jetë nga popullata heteroseksuale, në masën 95 për qind, dhe më pak tek kategoria MSM (meshkujt që bëjnë seks me meshkujt).
Rruga e transmetimit vijon të jetë ajo seksuale dhe grupmosha më e prekur është 25-44-vjeç, mosha aktive seksuale.
Ekspertët e shëndetit publik, thonë se “nga 80 rastet e reja në total për periudhën janar-tetor, 75 janë persona të popullatës heteroseksuale dhe 5 nga kategoria MSM (meshkujt që bëjnë seks me meshkujt). Shumica e rasteve me HIV janë të grupmoshës 35-44-vjeç, afro 29 për qind, 25-34-vjeç zënë 27 për qind të totalit të rasteve”, tha për Gazetasi.al eksperti Bani.
Me gjithë ndërhyrjet ndër vite për parandalimin e infektimeve me HIV/AIDS, në vendin tonë virusi vijon të identifikohet shumë vonë.
Të dhënat e Institutit të Shëndetit Publik për 10-mujorin 2022 raportojnë 11 viktima nga HIV, pacientë kryesisht të identifikuar në stadin e fundit të sëmundjes.
Ekspertët e shëndetit publik thonë se me gjithë shifrat e larta të testimeve vullnetare afro 50.027 nga 42 mijë testime që u kryen gjatë 2021, ku vetëm në Tiranë janë kryer mbi 7 mijë testime, sërish rastet e reja nuk u identifikuan nga testimet vullnetare, por nga klinika e spitalit infektiv në QSUT.
“Ne vijojmë të kryejmë testime tek kategoritë e riskut si dhuruesit e gjakut, gratë shtatzëna, MSM, përdoruesit e drogave, punonjëset e seksit etj, por të prekurit identifikohen nga klinika infektive e kryesisht në stade të vona. Pjesa më e madhe paraqesin infeksione në lëkurë, që kanë si shkak prekjen nga HIV”, thonë ekspertët.
Në 10-mujorn e 2022, numrit të rasteve të reja me HIV iu shtuan dhe 2 fëmijë të infektuar nga nëna. Aktualisht në QSUT trajtohen me terapinë e retroviralëve rreth 792 pacientë me HIV, shumica e të cilëve janë nga Tirana. Në total në Shqipëri janë 1586 pacientë që jetojnë me HIV prej vitit 1993 kur u diagnostikua rasti i parë./GazetaSi