Rama reagon sërish për Portin e Durrësit: Po e luftojnë projektin si djalli temjanin!
Kryeministri Edi Rama, ka reaguar sërish për Portin e Durrësit. Rama nuk i ka kursyer akuzat për kritikat, duke theksuar se numri i maskaragjozllëqeve që po thuhen për projektin janë pasqyrë e ligësisë.
“Numri i maskaragjozllëqeve që po thuhen për projektin madhor të Portit Turistik të Durrësit, si edhe hapësira e paanë mediatike në dispozicion të të paudhëve që po e luftojnë projektin si djalli temjanin, janë pasqyra e ligësisë që e ndjek këtë vend si mallkim qysh në vitin 1912!”, shkruan Rama në Twitter.
Duke iu përgjigjur kritikave lidhur me marrëveshjen për Portin Rama thekson se me këtë investim Durrësi do të transformohet ndër destinacionet kryesore turistike të Mesdheut, ndërsa thekson: “O me Durrësin në majë o me ata në plehra.
“Armiqësia kundër investimit më të madh në rajon, i cili do ta transformojë Durrësin në një ndër destinacionet kryesore turistike të Mesdheut, duhet t’iu shërbejë të gjithë durrsakëve për të parë fytyrën e armiqve të së ardhmes së Durrësit; o me Durrësin në majë o me ata në plehra!”, shkruan ai.