Aktualitet

Vdekja e 25-vjeçares në Elbasan, Manastirliu: Nuk është e lehtë të përballesh me ngjarje të tilla.

Ministrja e Shëndetësisë dhe Mbrojtjes Sociale, Ogerta Manastirliu, ka folur në lidhje me vdekjen e 25-vjeçares Rexhina Debrova në maternitetin e Elbasanit.

E ftuar në “Abcnews”, Manastirliu tha se është ngritur një grup ekspertësh të cilët do të bëjnë verifikimet e nevojshme për të zbardhur vdekjen e së resë nga Cërriku.

Ministrja tha se pas rezultateve të ekspertizës mjeko-ligjore do të përcaktohen dhe përgjegjësit për vdekjen e 25-vjeçares.

 “Është një ngjarje shumë e dhimbshme. Si ministre e Shëndetësisë, si grua shpreh ngushëllime familjes për humbjen. Nuk është e lehtë të përballesh me ngjarje të tilla. Më beso që asnjë mjek nuk do donte që të përballej me ngjarje të tilla. Sapo jam informuar kam ngritur një grup ekspertësh për të verifikuar protokollin që është ndjekur në rastin në fjalë.

Grupi është duke punuar. Paralelisht është prokuroria e cila po heton. Presim të dalin edhe  rezultatet e ekspertizës mjeko-ligjore në verifikimin që po bëhet në kuadër të hetimeve dhe do të marrim të gjithë vendimet e mëpasshme pas daljes së këtyre ekspertizave për të marrë dhe ngarkuar me përgjegjësi nëse do të ketë vend për përgjegjësi apo do të ketë vend për përmirësim të mëtejshëm në raport me shërbimin mjekësor në spital”, tha Manastirliu.

Rexhina Debrova ndërroi jetë pas operacionit ku solli një jetë një vajzë e cila gëzon shëndet të plotë.

Familjarët e 25-vjeçares kanë hedhur akuza ndaj mjekëve duke u shprehur se ata kanë ndërhyrë me vonesë. Ata thanë se mjekët e kanë futur të renë tre orë me vonesë pasi nisën dhimbjet.

Ndërkohë, në lidhje me këto akuza  reagoi Spitali i Elbasanit, duke thënë se mjekët kanë asistuar në mënyrë profesionale, por e reja kishte një shtatzëni të vonuar prej 42 javësh.

Rexhina Debrova dyshohet se mbeti e vdekur për shkak se pësoi komplikacion postoperatore “trombemboli pulmonare”./ Opinion.al E.Xh.

Total 0 Votes
0

Tell us how can we improve this post?

+ = Verify Human or Spambot ?