Ja sa pagoi Rama për të futur LSI në zgjedhje pa opozitën
Lulzim Basha tha në protestën përballë kryeministrisë se janë paguar miliona dollarë për të futur LSI në zgjedhjet e 18 qershorit. Duke folur para demokratëve të Elbasanit të thirrur në çadër, Lulzim Basha kujtoi 35 milion dollar shtesë që u paguan nga qeveria për rreshqitjen e tokës në autostradën Tiranë-Elbasan.
“35 milion dollar pagoi Edi Rama për rrëshqitjen e rrugës së autostradës për t’i mbyllur gojën Ilir Metës, që thoshte se nuk ka zgjedhje pa opozitën”
Në fakt, kërkesa për të paguar një shumë të tillë për punimet në autostradë u bë pak kohë më parë nga Ministri i Transporteve, Sokol Dervishi. Shuma e kërkuar habiti edhe vetë deputetët socialistë në komisionin e ligjeve, pasi bëhej fjalë vetëm për 4 kilometra rrugë. Pandeli Majko e quajti rrugën një varrezë lekësh, kur dëgjoi sa milion dollarë kërkoi ministri i LSI-së.
“Për 4 km na duhen 35 milion dollarë, ky është një precedent shumë i rrezikshëm. Kam një dyshim jashtëzakonisht të madh me thënë të drejtën, më duket sikur rruga Tiranë-Elbasan rrezikon të kthehet apo të konsiderohet një varrezë lekësh”
Pavarësisht shqetësimit që kishin për shumën e madhe të paguar nga buxheti i shtetit, socialistët e miratuan kërkesën e ministrit të LSI.