“Mini-Schengen”, Rama sot takim me Vuçiçin dhe Zaev

Aktualitet

Kryeministri Edi Rama ditën e sotme do të marrë pjesë në një konferencë online për “Mini-Schengen” së bashku me presidentin e serbisë, Aleksandër Vuçiç dhe kryeministrin e Maqedonisë së Veriut, Zoran Zaev.

Pak ditë më parë Vuçiç deklaroi se ai pret që të merren vendimet përfundimtare sa i përket veprimeve të përbashkta kundër katastrofave natyrore, apo edhe qarkullimit të mallrave, njerëzve dhe kapitalit.

Nisma “mini Schengen”, e cila aktualisht përfshin Serbinë, Shqipërinë dhe Maqedoninë Veriore, u nis në 2019 nga të tre vendet si një projekt për të përmirësuar ekonominë dhe bashkëpunimin rajonal.

Ideja e tre vendeve të Ballkanit Perëndimor është krijimi i një tregu të vetëm për të përshpejtuar zhvillimin e tyre ekonomik. Një ftesë për t’u bashkuar në këtë iniciativë u dërgua edhe në Kosovë, Mal të Zi dhe Bosnje.

Kosova u zotua në marrëveshjen e Washingtonit për t’ju bashkuar iniciativës së “Mini-Schengen”, por Albin Kurti, kryeministri aktual i Kosovës, që nga fillimi e ka pozicionuar veten si kritik i mprehtë i këtij projekti.