Nga Bislim Ahmetaj/ O shqiptarë: Problemi i problemeve është Rama dhe jo Ruçi!!!

“Ujku,ujku po çakalli po ban kërdinë.”

Ka ditë e si duket përgjatë gjithë kësaj vjeshtë krye temë e debateve politike nëpër rrjetet sociale, nëpër media të shkruara dhe elektronike , nëpër kafe dhe nëpër parqe do të jetë Gramoz Ruçi, i nominuar nga Edi Rama si Kryetar i Kuvendit të Shqipërisë. Për elaboratin e politikës shqiptare s’ka asgjë për tu çuditur, përkundrazi në aspektin ligjor është ngjarje krejtësisht normale. Gramoz Ruçi nuk mbiu nga dheu, ai është deputet i Kuvendit të Shqipërisë që në vitin 91, ndoshta është deputeti më jetëgjatë në këto 27 vite pluralizëm të rrëmë politikë.
Pse nuk duhet të jetë Gramoz Ruçi Kryetar I Kuvendit të Shqipërisë kur zgjedhjet e ka fituar partia e tij, në të cilën ai ka 30 e kusur vite që është dora e hekurt e saj, që mban postin e dytë atë të sekretarit të përgjithshëm ?!
Në aspektin ligjor e përmenda edhe më lartë atë se pengon as ligji i dosjeve, as ligji i dekriminalizimit, as ligji I konfliktit të interesave për të marrë çdo lloj posti në Republikën e Shqipërisë, të qënurit deputet do të thotë se je “i pastër” dhe “i çliruar” nga çdo pengesë për të drejtuar të gjitha institucionet në republikën tonë të indoktrinuar deri në asht.
Sot e dje përcolla reagimin e shumë eksponentëve të partive të djathta, shoqatave dhe grupeve te interesit që i përkasin të djathtës , aq sa dikush që s’po dua t’ja përmend emrin më tha që edhe unë si Kryetar i Grupimit “Dhjetor 90” duhet të mbaja një qëndrim për këtë çeshtje . Ishte pikërisht kjo shtysa për të shkruar këtë shkrim.
E gjithë kjo zagushi fund-gushti mua më duket kryekëputë sarkazëm dhe ironi bolshevike, propagandë e shpërlarë për të konsumuar energji boshe gjoja në emer të opozitarizmit.
Po kush duhet të jetë kryetar i kuvendit kur zgjedhjet i ka fituar e vetme trashëgimtarja e Partisë së Punës , unë nipi i të pushkatuarit që në gjithë fisin tim se pata qoftë edhe një komunist të vetëm?!
Cilët duhet të jenë ministra të qeverive të majta përveç bijve të komunisteve dhe drejtuesve të lartë të regjimit komunist?
A mendoni që në postet ministrore dhe në ato kyçe duhet të jene djemtë dhe vajzat e të pushkatuerve, të burgosurve, te internuarve, të klerikëve, të shpronësuerve dhunshëm apo të atyre që ishin shtresa e mbijetesës, djem e vajza të mesuesve dhe speçialistëve të thjeshtë që ngopën barkun me bukë dhe jetuan në burgun e hapur me emrin RPSSH!!!
Pyetjen e kam për ju që merreni me propagandë shterpë , e prodhoni dhe e shpërndani atë për të ngopur mendjet e varfra që ky vend fatkeqesisht i ka me shumicë dhe ju jua sërvirni si pjata supe nëpër mencat sociale.
Partinë Socialiste e mbështetin dhe e sjellin në pushtet enveristët, komunistët, punëtorët dhe bashkëpunëtorët e sigurimit të shtetit dhe natyrshëm pjellat e tyre të shërndara me kujdes në të gjithë spektrin politik shqiptarë, por që kur vinë zgjedhjet votat i japin për partinë mëmë.
Sigurisht që pjella e tyre do të qeverisë pasi baballarët dhe gjyshërit ose kanë vdekur ose janë të pamundshëm fizikisht për të drejtuar institucione në kushtet e reja siç porosiste edhe udheheqesi i fundit komunist në kapërçyell të ndryshimeve.
Ndaj nuk është kurrfarë befasie nominimi i Gramoz Ruçit në krye të Kuvendit të Shqipërisë, as rikonfirmimi i nipit te Spiro Kolekës në postin e kryeministrit, as posti i ministrit të jashtëm që ju ribesua djalit të një anëtari të byrosë politike as, as, as, as…asnje portofol apo post i larte qeveritar që ju besohet bijve dhe bijave trashëgimtarë të diktaturës komuniste të strehuar besnikërisht tek partia që hoqi shaminë e kuqe, veshi shaminë rozë dhe tani ka një shami mavi me dy gishtat lartë që këput një trendafil.
Këtu ka vetëm një çeshtje të “vogël” morale, por të lypësh moral në politikën shqiptare në përgjithësi dhe tek e majta në mënyrë të veçantë është njëlloj si të kërkosh virgjeresha tek dritat e kuqe në Amsterdam apo Bruksel.
Për të djathtën po që s’është as etike, as morale bile është kriminale në aspektin human të emërojë në poste politike bij përsekutorësh, apo të mbajë në poziçione kyçe drejtues të regjimit komunist.
E verteta është therëse dhe djeg si rrufeja në të kthellët, në dy qeverisjet e saj pinjoll të diktaturës kanë mbajtur deri pozicione zëvëndës kryeministrash pa përmendur turmat e zyrtarëve të lartë, ambasodorëve dhe deputeteve që vetën e tyre apo rrënjët familjare I kanë pas të ngulura thellë në nevojtoren komuniste.
Ndaj është krejtësisht i panevojshëm harxhimi I energjive të njerëzve të opozitës me demagogji bolshevike për të mbajtur gjallë frymën e opozitarizmit falls.
Propaganda që është prodhuar nëpër industritë propagandistike të së majtës dhe po ju sherbehet me shumicë rrjeteve sociale, mediave të shkruara dhe elektronike gjoja për “kauza” antikomuniste të opozitës s’është gjë tjetër veçse ilaçi për të përgjumur opozitën dhe për të harruar varfërinë dhe mizerjen ku është zhytur ekonomia e vendit.
Unë s’mund të them me siguri që opozita ka zgjedhur me leje të Ramës këtë “kauzë” shterpë për të kaluar vjeshtën me emrin e Gramoz Ruçit por si duken bathët kështu është konfiguruar regjia dhe kështu po funksionon .
Të ushqyerit me politikë është një dietë me efektivitet shumë të lartë dhe e stërprovuar në habitatin shqiptarë.
Edi Rama ndoshta qysh në takimin me Bashën kur edhe siguroj fitoren e sigurtë e ka pas të projektuar Ruçin si kryetar kuvendi pasi në mandatin e dytë s’mund të justifikohet më me slloganin “Fajin e ka Berisha!” kështu që në mungesë të një plani zhvillimor nxitja e luftës së klasave është një produkt propagandistik i provuar si i suksesshëm .
Duke mos pasur asnjë prespektivë ekonomike, asnjë investim të huaj, asnjë prognozë apo projekt konkret për të ndalur varfërimin dhe ikjen e shqiptarëve atë e kanë mësuar ose ja ka qëlluar vet ti ushqej bashkëqytetarët tij me supën e tyre të dashur propaganden bolshevike të luftës së klasave.
Tiranë me 28 Gusht 2017